Boosaaso 01/29/2001/

  Ka dib horraantii bishii Aug ee sannadkii la soo dhaafay, waxa gobollada Punt-land ka jirey dhibaatooyin fara badan kuwaasoo khal khal geliyey deganaanshihii iyo nabadgelyadii gobolladan lagu yaqaaney, mawjadahan siyaasadeed ee ruxay isla markaana gilgiley jiritaankii Punt-land kuwaasoo abuuray jawi colaadeed oo dad badani ku dhinteen kuwo kalena ay ku dhaawacmeen isla markaana keenay bur-bur dhaqaale iyo barakac magaalooyinka qaarkood ayaa ahaa kuwo xiisaddoodu ay sii kacaysey maalinba maalinta ka dambeysey, ka dib dagaalkii malleeshiyada taageerta Col. C/laahi Yuusuf oo isagu sheegta inuu yahay madaxweynaha xaqa ah ee Punt-land ay ku qabsadeen  magaalada Garoowe, ayaa waxa laga dareemayey magaaladaas is beddel weyn oo saameeyey dhamaanba qaybaha kala duwan ee nolosha degaanka sida Nabadgelyda, Waxbarashada, Ganacsiga iyo nolol maalmeedka caadiga ahba, malleeshiyooyin kala taageersan dhinacyada isku haya maamulka Punt-land ayaa badi laga dareemayey dhaqdhaqaaqyadooda bartamaha iyo daafaha magaalada Garoowe kuwaasoo ay qoloba qolada kale maaganayd iney awood ku muquuniyaan, walow isimada iyo wax garadka deegaanaka Nugaal ay kala hor joogeen kuna dadaalayeen inaan wax isku dhac ahi aanu dhex marin ciidamada sida xoogga leh u hubaysan ee fadhiisimada isku hor fadhiya halkaasi, dhanka kale magaalooyinka Boosaaso iyo Qardho ayaa iyaguna ahaa kuwo lahaa diyaar garow iyo abaabul ciidan oo ku wajahan garabka kale ee ay siyaasadda isku diiddan yihiin, olole ballaadhar ciidamo si weyn loo dumayo ayaa ka jirey meelo badan oo ka mid ah gobolka Bari muddo haatan laba bilood iyo in ka badan ah.

Dhanka kale Col. Jaamac Cali Jaamac oo isaguna sheeganaya inuu yahay madaxeynaha Puntland ee sida sharciga ah lagu soo doortay shirweynihii labaad ee dastuuriga ahaa ee ka dhacay magaalada Garoowe ayaa waxa uu fariisin ka samaystay magaalada Boosaaso oo ah xarunta Gobolka Bari, ma jirin cid ukala dab qaadday labada hogaamiye garab ee isku haysta siyaasadda Puntland, kasokow dadaal ay isimada iyo waxgaradka gobolka nugaali  ku doonayeen xasiloonnida deegaanka Nugaaleed, inkastoo ay jireen baaqyo nabadeed oo ay soo saareen Isimada, Nabaddoonada, wax garadka, Aqoonyahaynnada iyo ururada haweenka Puntland haddana ma jirin labada garab siyaasadeedba cid dheg jalaq u siisay baaqyadaas nabadeed, kala duwanaanta aragtida siyaasadeed ee labada dhinac iyo kala taageersanaantooda ayaa iyaduna waxay door ku yeelatay kala qaybsanaan ku timi bulshada dhexdeeda walow ay dadku ka mideysan yihiin in markale la helo maamul mid ah isla markaana la soo celiyo nadaamkii iyo kala dambayntii lagu yiqiinney gobollada Puntland, isku soo wada duuboo lama garanayo mana jirto cid saadaalin karta halka ay caga dhiganayso siyaasadda murugsan ee kala daadisay hannaankii maamul ee ay ku caan baxeen gobollada Puntland.

Si kastaba xaaladdu ha ahaatee waxaa lagu soo gabagabeeyey magaalada Garoowe shir waayahanba uga socdey Isimada iyo wax garadka deegaanka nugaaaleed, ergooyinka shirkaasi oo ka kala yimid dhamaanba degmooyinka iyo tuulooyinka uu ka kooban yahay gobolku, ayaa  maalinnimadii shalay lagu soo gabagabeeyey xarunta gobolka Nugaal ee magaalada Garoowe shirkaasoo lagu gaarey go’aamo dhawr ah oo ay ku saxiixnaayeen Islaan Maxamed Islaan Muuse iyo Suldaan Siciid Maxamed Garaase, waxayna labada isim isla maalinimadiiba iyagoo dadka kala hadlaya meel fagaare ah u sheegeen in la dhawro nabadda iyo xasilloonida lagana waantoobo wixii shaqaaqo horseedi kara. Go’aamadan  oo ay ka mid ahaayeen

v     In dhamaan malleeshiyada taageersan col. Jaamac Cali Jaamac iyo kuwa taageersan Col. C/laahi Yuusuf dhamaan laga qaado magaalada Garoowe

v     In ciddii diidda iney fuliso go’aamadan ka soo baxay isimada iyo wax garadka deegaanka Nugaaleed loo arkayo iney doonayaan iney dhibaato ka abuuraan deegaanka.

  Waxay kaloo isimadu dadka u sheegeen in deegaanka Punt-land aysan kala lahayn dadka u dhashay gobolladani hase ahaatee ay jiraan duruufo kallifay iney soo saaraan go’aamadan.

  Mar aan telefoonka kula xiriiray mid ka mid ah ragga ugu dhowdhow Col. Jaamac Cali Jaamac ayaa wuxuu ii sheegay ineysan jirin wax ciidan ah oo Garoowe ka jooga Maamulka uu madaxda ka yahay Jaamac waa sida uu hadalka u dhigaye, hase yeeshee wuxuu intaas ku daray iney diyaar u yihiin hindise kasta oo macquul ah oo lagu baadi goobayo hannaankii nabadda iyo xasilloonida ee Puntland, sidoo kale mar aan telfoonka kula hadlay magaalada Garoowe ayaa waxa la ii sheegay in Col. C/laahi Yuusuf iyo taageerayaashiisuba ay talo dib isugula noqonayaan isla markaana ay maamlmo ka dib soo saarayaan waxa ay ka qabaan go’aamada ka soo baxay shirkii isimada iyo wax garadka gobolka Nugaal.

  Axmed Cabdi Sugulle     Boosaaso.                                 Back to main page